ಕನವರಿಕೆ

ನನ್ನದೇ ಬಿಂಬ ತುಂಬಿಕೊಂಡವನ ಕಂಗಳಲ್ಲಿ

ಮೂಡಹತ್ತಿತು 

ಮಸುಕಾದ ಅಪರಿಚಿತ ಚಿತ್ತಾರ..

ಕೂಡಿ ಕಳೆದ ಕ್ಷಣಗಳೆಲ್ಲವ 

ಮಾಸಿದವು

ಅವಳ ಮೆಲುದನಿಯ 

ಉದ್ಗಾರ..

ಅವನ ನಗು ಪ್ರತಿಫಲಿಸಿದ 

ಕಣ್ಣ ಹನಿಗಳಿಂದು 

ಅನಾಥ..

ಆ ನಗುವೇ ಕಾಡಲಿದೆ 

ಇನ್ನೆಂದೂ ಅನವರತ..

ಕಾರಣಗಳು ಹಲವು..

ಸಮಾಜ, ಕಟ್ಟಳೆಗಳು, ನೈತಿಕತೆ, ನಂಬಿಕೆಗಳು..

ಕೊಲೆಯಾಯ್ತು  

ಪರಿಶುದ್ಧ ಒಲವು..

ಹಿಂದೊಮ್ಮೆ ಸಂತಸದ ಹೊನಲ ಸೂಚಿಸಿದ್ದ

ಅಂಗೈ ರೇಖೆಗಳೇ..

ಕಟ್ಟಿಹಾಕಿವೆ ಇಂದು 

ಅಸಹಾಯಕ ಮನವ..

ಸಾವಿರ ಬಣ್ಣದ ರೆಕ್ಕೆಗಳ ಕನಸು ಹೊತ್ತ

ಕೋಶದೊಳಗಿನ 

ಪುಟ್ಟ ಜೀವ 

ಚಿಟ್ಟೆಯಾಗಲೇ ಇಲ್ಲ..!!